سرینگر کے گگری بل بچھوارہ میں ایک پبلک پارک تعمیر کرنے کا مطالبہ

سرینگر؛۔اپنی پارٹی کے سینئر نائب صدر غلام حسن میر نے حکام پر زور دیا ہے کہ وہ ڈلگیٹ سرینگر کے گگری بل بچھوارہ علاقے میں مقامی باشندگان کی جانب سے ایک پارک کی تعمیر کے مطالبے کا جائزہ لیں۔ انہوں نے کہا ہے کہ اس علاقے میں سرکار نے ایک قطعہ اراضی کار پارکنگ کے لئے رکھا ہوا ہے، لیکن مقامی باشندگان چاہتے ہیں کہ یہاں پر کار پارکنگ کے ساتھ ساتھ مقامی رہائشیوں کے لئے ایک پبلک پارک بھی تعمیر کی جائے۔اس سے قبل مقامی باشندگان پر مشتمل ایک عوامی وفد نے غلام حسن میر سے ملاقات کی اور اُن کی درخواست کی کہ وہ یہ عوامی مطالبہ متعلقہ حکام کی نوٹس میں لانے کےلئے اپنا اثر و رسوخ کا استعمال کریں۔ اراکینِ وفد نے اپنی پارٹی کے لیڈر کو بتایا، “ہمارے علاقے میں ایک قطعہ اراضی کار پارکنگ کی تعمیر کے لئے حکومت نے الاٹ کیا ہے، لیکن ہمارے علاقے میں کوئی بھی پبلک پارک موجود نہیں ہے۔ اس ہم چاہتے ہیں کہ اسی قطعہ اراضی پر کار پارکنگ کے ساتھ ساتھ ایک پبلک پارک بھی تعمیر کی جائے۔”غلام حسن میر نے انتظامیہ سے کہا ہے کہ وہ عوام کی اس جائز مانگ کو پورا کرنے کے لئے اقدامات کریں۔ اُنہوں نے کہا ہے کہ اگر مقامی لوگ خالی قطعہ اراضی پر ایک کار پارکنگ کے ساتھ ساتھ ایک پبلک پارک کی تعمیر کے خواہاں ہیں تو ایسا ہی ہونا چاہیے۔