پونچھ……انفو…. نائب وزیر اعلیٰ مسٹر سریندر چودھری نے ضلع پونچھ کا دورہ کیا اور ڈاک بنگلہ پونچھ کے کانفرنس ہال میں پی ڈبلیو ڈی ( آر اینڈ بی ) اور متعلقہ محکموں بشمول صنعت و تجارت ، لیبر اینڈ ایمپلایمنٹ ، سکل ڈیولپمنٹ اور مائننگ کے ضلعی اور سیکٹرل افسران کے ساتھ ایک تفصیلی جائیزہ اجلاس کی صدارت کی ۔ اجلاس کے آغاز میں نائب وزیر اعلیٰ نے جاری اسکیموں اور ترقیاتی کاموں بشمول سڑکیں ، پُل اور محکمانہ کامیابیوں کا تفصیلی جائیزہ لیا ۔ انہوں نے عوامی خدمات کی فراہمی کو بہتر بنانے کی ضرورت پر زور دیا اور نوجوانوں اور عام لوگوں کیلئے فلاحی اسکیموں کے حوالے سے بیداری کیمپوں کو تیز کرنے کی ہدایت دی ۔ آئی ٹی آئی اور پولی ٹیکنک اداروں کی حیثیت کا بھی تفصیل سے جائیزہ لیا گیا ۔ اجلاس کے دوران مسٹر سریندر چودھری نے منی سیکرٹریٹ مہینڈھر کی تعمیر سمیت بڑے جاری پروجیکٹوں کا جائیزہ لیا اور متعلقہ افسران کو ہدایت دی کہ باقی کام کو جلد مکمل کیا جائے ۔ انہوں نے پی ڈبلیو ڈی انجینئرز کو جموں یونیورسٹی کیمپس پر تعمیراتی سرگرمیوں کو تیز کرنے کی بھی ہدایت دی ۔ ویلیج بہڑہ مہینڈھر میں ماڈل رہائشی سکول کی ترقی کے حوالے سے پیش رفت پر تبادلہ خیال کیا گیا اور نائب وزیر اعلیٰ نے سخت ہدایات جاری کیں کہ رفتار کو بہتر بنایا جائے اور اعلیٰ معیار کو برقرار رکھا جائے ۔ انہوں نے مختلف سڑکوں اور موٹر ایبل پلوں کے پروجیکٹوں کا بھی جائیزہ لیا اور مقررہ ٹائم لائن کے اندر کام مکمل کرنے کی ضرورت پر زور دیا ۔پی ایم جی ایس وائی پروجیکٹوں کا جائیزہ لیتے ہوئے انہوں نے ان کی ٹینڈرنگ کی حیثیت اور اخراجات کا معائنہ کیا ۔ نائب وزیر اعلیٰ نے او سی جی آر ای ایف کو ہدایت دی کہ جاری کاموں کا زمینی معائینہ کریں ، معیار کی جانچ پڑتال کو یقینی بنائیں اور عوام کیلئے ہموار سفر کی سہولت کیلئے گڈھوں کو صاف کیا جائے ۔ مسٹر چودھری نے متعلقہ محکموں پر زور دیا کہ ڈی ڈی سیز ، ایم ایل ایز اور متعلقہ اسٹیک ہولڈرز کے ساتھ قریبی رابطہ برقرار رکھا جائے تا کہ ترقیاتی کاموں کی بہتر نگرانی اور موثر عمل درآمد کو یقینی بنایا جا سکے ۔ اجلاس میں ڈی ڈی سی چئیر پرسن تظیم اختر ، ایم ایل اے سرنکوٹ چوہدری محمد اکرم ، چیف انجینئر سمیت ضلعی اور متعلقہ محکموں کے دیگر سینئر افسران نے شرکت کی ۔
نائب وزیر اعلیٰ نے پونچھ میں ایم ترقیاتی کاموں کا جائیزہ لیا
