جموں…انفو….وزیر برائے خوراک ، شہری رسدات و امورِ صارفین ، ٹرانسپورٹ ، اَمورِ نوجوان و کھیل کود ، آئی ٹی ، اے آر آئی اینڈ ٹریننگزمحکمہ جات ستیش شرما نے آج گورنمنٹ سری رنبیر ماڈل ہائیر سکینڈری سکول پریڈ جموں میں سالانہ سکول میگزین ” دھروہر“ کی رسم رونمائی کے موقعہ پر تاریخ ، ورثہ اور ثقافتی اقدار کے تحفظ کی اہمیت پر زور دیا ۔ اُنہوں نے طلباء، فیکلٹی ممبران اور مہمانوں سے خطاب کرتے ہوئے کہا کہ تاریخ ، ورثہ اور اقدار ہر معاشرے کی بنیاد ہیں اور انہیں آنے والی نسلوں کیلئے محفوظ اور زندہ رکھنا ضروری ہے ۔ انہوں نے زور دیا کہ تعلیمی ادارے نوجوان ذہنوں میں ثقافتی شعور پیدا کرنے اور انہیں اپنی جڑوں سے جوڑے رکھنے میں اہم کردار ادا کرتے ہیں ۔ وزیر نے کہا، ” تاریخ ، ورثہ اور اقدار ہماری شناخت کی بنیاد ہیں ۔ ہمیں ان کی بحالی اور احیاءکیلئے اجتماعی اقدامات کرنے چاہئیں تا کہ آنے والی نسلیں نہ صرف ترقی بلکہ اپنی روایات پر فخر بھی حاصل کریں ۔“ انہوں نے سکول انتظامیہ کی سراہنا کی کہ انہوں نے سالانہ میگزین شائع کیا جسے انہوں نے طلباءکی تخلیقی صلاحیتوں ، فکری ترقی اور ثقافتی بیداری کا عکاس ایک معنی خیز پلیٹ فارم قرار دیا ۔ انہوں نے کہا کہ ایسی کاوشیں ادارے کی میراث کو محفوظ رکھنے کے ساتھ ساتھ طلباءکو اپنے ورثہ کو دستاویزی شکل دینے اور منانے کی ترغیب دیتی ہیں ۔ پروگرام میں طلباءاور عملے کی پرجوش شرکت دیکھی گئی جنہوں نے وزیر کی موجودگی اور حوصلہ افزائی پر شکریہ ادا کیا ۔ پروگرام کا اختتام ” دھروہر “ کی رسمی رونمائی اور جموں سمیت اس سے آگے ثقافتی ورثہ کے تحفظ کیلئے مشترکہ عزم کی تجدید کے ساتھ ہوا ۔ اس سے قبل وزیر نے ادارے کی لائبریری کا دورہ کیا اور وہاں موجود مختلف آثار قدیمہ اور مخطوطات کی ڈیجیٹائزیشن پر زور دیا ۔
ستیش شرما نے جموں میں سکول میگزین کی رسم رونمائی کے موقعہ پر ورثہ اور اقدار کے تحفظ پر زوردیا
