لیفٹیننٹ گورنر نے جموں میں جسمانی طور خاص اَفراد کے عالمی دِن کی تقریب میں شرکت کی

جموں…. انفو……..لیفٹیننٹ گورنر منوج سِنہا نے بدھ کے روز کہا ،”میںدیویانگ جنوں کی ہمت، عزم اور اُن کی بے پناہ صلاحیت کو سلام پیش کرتا ہوں۔ ہم ایک ایسا نظام بنانے کے لئے پُرعزم ہیں جو اُن کے خوابوں اور اُمنگوں کے مطابق ہو، تمام رکاوٹوں اور چیلنجوں کا خاتمہ کرے۔“۔ لیفٹیننٹ گورنر پدم شری پدماسچدیو گورنمنٹ کالج فار وومن گاندھی نگر میں”جسمانی طو رخاص اَفراد کے عالمی دِن “ کی ایک تقریب سے خطاب کر رہے تھے۔اِس تقریب کااِنعقاد کمپوزٹ ریجنل سینٹر فار سکل ڈیولپمنٹ، ری ہیبلی ٹیشن اینڈ امپاورمنٹ آف پرسنز وِد ڈِس ایبلٹیز (سی آر سی) جموںنے ’صلاحیت کا جشن، ثقافت کا تحفظ ‘کے موضوع کے تحت کیاتھا۔ اِس سال ’جسمانی طور خاص اَفراد کے عالمی دِن‘ کا عالمی تھیم ”معذوری پر مشتمل معاشروں کو فروغ دینا سماجی ترقی کو آگے بڑھانا“ ہے۔لیفٹیننٹ گورنر نے اَپنے خطاب میں تمام حکام اور سماجی تنظیموں پر زور دیاکہ وہ دیو یانگ جنوں کے حقوق کے تحفظ اور فروغ کا عہد کریں۔اُنہوں نے کہا ،”دیویانگ جنوں کی شمولیت ہی مساوی ترقی کی بنیاد ہے۔ ہمیں حساسیت، شعور اور مشترکہ عزم کے ساتھ کام کرنا ہوگا تاکہ اُن کے وقار، بامعنی شرکت کو یقینی بنایا جا سکے اور تعلیم، مہارت اور روزگار تک اُن کی رَسائی کی ضمانت دی جا سکے۔“لیفٹیننٹ گورنر نے دیویانگ جنوں کو سماجی و اِقتصادی طور پر بااِختیار بنانے کے لئے جامع مدد فراہم کرنے کی خاطر یوٹی اِنتظامیہ کے کلیدی اَقدامات کا اِشتراک کیا۔اُنہوں نے کہا کہ وزیر اعظم نریندر مودی کی قیادت میں دیویانگ جنوں کو مساوی مواقع، مساوی حقوق اور معیاری زِندگی فراہم کرنے کے لئے خصوصی کوششیں کی گئی ہیں۔لیفٹیننٹ گورنر نے کہا،”ہم سب کو مل کر ایک ایسا جموں و کشمیر بنا نا چاہیے جہاں رسائی معمول ہو، جہاں ہر دیویانگ جن کو تمام سہولیات، مساوی روزگار کے مواقع اور زِندگی باوقار گزارنے کے لئے جدید تکنیکی آلات تک رسائی میسر ہو۔“لیفٹیننٹ گورنر نے کمپوزٹ ریجنل سینٹر جموں کی بھی سراہنا کی کہ وہ دیویانگ جنوں کی بحالی اور بااختیاری کے لئے قابلِ تحسین کام کر رہا ہے۔سی آر سی جموں نے 2024 سے 35,000 سے زیادہ کلینیکل سروے کئے ہیں اورزائد اَز 2 کروڑ روپے مالیت کے اِمدادِی آلات تقسیم کئے ہیں جس سے بے شمار زندگیاں بدل گئی ہیں۔اِس موقعہ پر لیفٹیننٹ گورنر نے مستحقین کو اِمدادی آلات اور کٹس تقسیم کیں اور مختلف سماجی خدمت تنظیموں کے سٹالوں کا بھی معائینہ کیا۔اِس موقعہ پررُکن قانون ساز اسمبلی باہووکرم رندھاوا ،ڈائریکٹر کالجز پروفیسر (ڈاکٹر) شیخ اعجاز بشیر ،ڈائریکٹر سی آر سی جموں اور سانبہ ڈاکٹر رہنیکا شرما ، سینئر حکام، تعلیمی اِداروں کے سربراہان، ممتاز شہری، مختلف سماجی تنظیموں کے اراکین، طلبا اور عوام کی بڑی تعداد نے شرکت کی۔