ہندوستان کا اصل دشمن دوسری قوموں پر انحصار /وزیر اعظم مودی

سرینگر۔۔۔۔20ستمبر ۔۔۔۔سی این آئی۔۔۔۔۔۔۔ وزیر اعظم نریندر مودی نے ” آتم نر بھر بھارت “ کیلئے ایک مضبوط موقف پیش کرتے ہوئے کہا کہ ہندوستان کا اصل دشمن دوسری قوموں پر انحصار ہے اور اس بات پر زور دیا کہ ملک کو چپس سے لے کر جہاز تک سب کچھ بنانا چاہیے۔سی این آئی کے مطابق گجرات کے بھاو نگر کے گاندھی میدان میں ’سمندر سے سمردھی‘ تقریب سے خطاب کر تے ہوئے وزیر اعظم نریندر مودی نے کہا کہ ہندوستان کا اصل دشمن دوسری قوموں پر انحصار ہے ۔ انہوں نے کہا ”حقیقی معنوں میں، ہندوستان کا دنیا میں کوئی بڑا دشمن نہیں ہے، ہندوستان کا واحد دشمن دوسرے ممالک پر انحصار ہے، ہمیں دوسروں پر اس انحصار کو شکست دینے کی ضرورت ہے، ہمیں یہ سمجھنا ہوگا کہ ہم جتنا دوسروں پر انحصار کرتے ہیں، ناکامی کی شرح زیادہ ہوتی ہے۔ “ وزیر اعظم مودی نے کہا ”چپس سے لے کر بحری جہاز تک، ہمیں سب کچھ بنانا چاہیے۔ امن، استحکام اور دولت کے لیے، دنیا میں سب سے زیادہ آبادی والے ملک کو خود انحصار بننا ہوگا۔ “ انہوں نے کہا کہ ہندوستان کے تمام مسائل کی ایک ہی دوا ہے اور وہ ہے آتم نر بھر بھارت ۔ اس طرح کے انحصار کے مالی بوجھ کو بتاتے ہوئے مودی نے کہا کہ ملک دنیا بھر میں اپنا سامان بھیجنے کے لیے غیر ملکی فرم کو سالانہ 6 لاکھ کروڑ روپے ادا کرتا ہے۔انہوں نے کہا ’ یہ ہمارے دفاعی بجٹ کے تقریباً برابر ہے۔ “ تقریباً 50 سال پہلے، ملک کی 40 فیصد تجارت ہندوستانی جہازوں کے ذریعے ہوتی تھی، لیکن اب یہ گھٹ کر صرف 5 فیصد رہ گئی ہے، وزیر اعظم نے نشاندہی کی۔وزیر اعظم نے کہا کہ ان کی حکومت نے بڑے بحری جہازوں کو بنیادی ڈھانچے کے طور پر تسلیم کرتے ہوئے ہندوستان کے بحری شعبے کو مضبوط بنانے کا ایک تاریخی فیصلہ کیا ہے۔انہوں نے کہا ” ہندوستان کی بندرگاہیں عالمی سمندری پاور ہاو¿س کے طور پر ہمارے ملک کے عروج کی ریڑھ کی ہڈی ہیں۔ “