جموں وکشمیر ہندوستان کا تاج اور سال بھر کی پسندیدہ منزل/ منوج سنہا

سری نگر…۷۲،ستمبر….جے کے این ایس…. جمعہ کے روز جموں وکشمیرمیں12سیاحتی مقامات کو دوبارہ کھولنے کااعلان کرنے کے ایک روز بعدلیفٹنٹ گورنر منوج سنہا نے ہفتہ کو ”جموں وکشمیرکوہندوستان کا تاج اور سال بھر کی پسندیدہ منزل“قرار دیتے ہوئے سیاحوں سے اپیل کی ہے کہ وہ شاندار مناظر، بھرپور ثقافتی ورثہ اور بے مثال مہمان نوازی سے لطف اندوزہونے کیلئے یہاں آئیں۔جے کے این ایس کے مطابق لیفٹنٹ گورنر منوج سنہانے سیاحت کے عالمی دن پر، ایک پیغام میں کہاکہ میں آپ (سیاحوں) سب کو جموں و کشمیر کا دورہ کرنے کی دعوت دیتا ہوں۔ایل جی آفس نے ایکس پرلیفٹنٹ گورنر منوج سنہاکی جانب سے عالمی یوم سیاحت کے موقع پرایک پیغام جاری کیا۔اپنے پیغام میں لیفٹنٹ گورنر منوج سنہا نے کہاکہ قدرت نے جموں وکشمیرکوشاندار قدرتی مناظر، ایک بھرپور ثقافتی ورثہ اور بے مثال مہمان نوازی سے نوازاہے۔انہوںنے جموں وکشمیرکو ہندوستان کا تاج زیور قرار دیتے ہوئے مزید کہاکہ جموں وکشمیرسال بھر کی پسندیدہ منزل ہے، جو دلکش خوبصورتی اور روحانی تجربہ پیش کرتا ہے۔قابل ذکرہے کہ جمعہ کویہاں راج بھون میں یونیفائیڈ ہیڈ کوارٹر کی ایک اہم اوراعلیٰ سطحی میٹنگ کے بعدلیفٹنٹ گورنر منوج سنہا نےجموں وکشمیرمیں پہلگام حملے کے بعدبند کئے گئے 12سیاحتی مقامات کو کھولنے کے احکامات جاری کئے۔منوج سنہانے اہم سیکورٹی جائزہ میٹنگ کے بعد جمعہ کو شام دیر گئے ایکس پر لکھاکہ آج کیUHA میٹنگ میں مکمل سیکورٹی جائزہ اور بحث کے بعد، میں نے کشمیر اور جموں ڈویڑنوں میں مزید سیاحتی مقامات کو دوبارہ کھولنے کا حکم دیا ہے، جنہیں احتیاطی تدابیر کے طور پر عارضی طور پر بند کر دیا گیا تھا۔منوج سنہا نے کہاکہ کشمیر ڈویڑن میں7 سیاحتی مقامات بشمول آڈو ویلی ، رافٹنگ پوائنٹ یانر، اکاڈ پارک، پادشاہی پارک، کمان پوسٹ اور جموں ڈویژن کے5 سیاحتی مقامات بشمول ڈگن ٹاپ، رامبن، کٹھوعہ میں دھگر، سلال میں شیو غار، ریاسی پیر 29 ستمبر سے دوبارہ کھولے جائیں گے ۔