وقف رجسٹریشن میں تاخیر پر اگلے 3 ماہ تک کوئی جرمانہ نہیں / کرن رججو

سرینگر…..05دسمبر…. ایس این این …..وقف رجسٹریشن میں تاخیر پر اگلے 3 ماہ تک کوئی جرمانہ نہیں ہے کا اعلان کرتے ہوئے مرکزی وزیر برائے اقلیتی امور کرن رججو نے متولیوں پر زور دیا کہ وہ ٹریبونل سے رجوع کریں، کیونکہ وقف (ترمیمی) ایکٹ کے تحت اسے توسیع دینے کا اختیار حاصل ہے۔سٹار نیوز نیٹ ورک کے مطابق مرکزی وزیر برائے اقلیتی امور کرن رججو نے اعلان کیا کہ مرکز رجسٹریشن کی آخری تاریخ کے بعد اگلے تین ماہ تک وقف قانون کے تحت UMEED پورٹل پر جائیدادوں کا اندراج کرنے والے متولیوں کے خلاف جرمانہ عائد نہیں کرے گا اور نہ ہی سخت کارروائی کرے گا۔نامہ نگاروں سے بات کرتے ہوئے رججو نے کہا کہ کئی ممبران پارلیمنٹ اور سماجی رہنماو¿ں نے آخری تاریخ میں توسیع کی درخواست کی تھی، جو کہ 5 دسمبر ہے، لیکن سپریم کورٹ نے چھ ماہ کی ڈیڈ لائن کے بعد اسے دینے سے انکار کر دیا۔مرکزی وزیر نے متولیوں پر زور دیا کہ وہ ٹریبونل سے رجوع کریں، کیونکہ وقف (ترمیمی) ایکٹ کے تحت اسے توسیع دینے کا اختیار حاصل ہے۔کرن رججو نے کہا”وقف قانون بنانے کے بعد ہم نے UMEED پورٹل شروع کیا تھا اور تمام وقف املاک کو پورٹل پر رجسٹر کرنے کے لیے متعلقہ فریقوں کو چھ ماہ کا وقت دیا گیا تھا۔ آج آخری دن ہے، اور لاکھوں جائیدادوں کا ابھی تک اندراج نہیں کیا گیا ہے۔ بہت سے ممبران پارلیمنٹ اور سماجی رہنما میرے پاس آئے اور میرے پاس وقف کی مدت میں توسیع کی درخواست کی، اب 5 لاکھ سے زیادہ جائیدادوں کو وقف کی تاریخ میں رجسٹر کیا گیا ہے“۔انہوں نے کہا ” میں تمام متولیوں کو یقین دلاتا ہوں کہ اگلے تین ماہ تک ہم UMEED پورٹل پر رجسٹریشن کرنے والوں پر کوئی جرمانہ عائد نہیں کریں گے اور نہ ہی کوئی سخت کارروائی کریں گے۔ اگر آپ رجسٹریشن کرانے سے قاصر ہیں تو میری درخواست ہے کہ آپ ٹربیونل میں جائیں۔ سپریم کورٹ نے اپنی ہدایات پر واضح کیا تھا کہ چھ ماہ کی ڈیڈ لائن کے بعد تاریخ میں توسیع نہیں کی جا سکتی، لیکن اس نے ٹربیونل کو مزید چھ ماہ کی توسیع دے دی“۔رججو نے زور دے کر کہا کہ جب کہ مرکز زیادہ سے زیادہ ریلیف فراہم کرے گا، وہ قانون کا پابند ہے۔انہوں نے کہا ”ہم اپنے لوگوں کو زیادہ سے زیادہ ریلیف دینے کی پوری کوشش کرتے ہیں، لیکن کچھ چیزیں قانون کے پابند ہیں۔ چونکہ پارلیمنٹ نے وقف ترمیمی ایکٹ پاس کیا ہے، ہم اس قانون کو تبدیل نہیں کر سکتے۔ “