لیفٹیننٹ گورنر نے جے ایل این ایم ہسپتال رعناواری سری نگر کا دورہ کیا

سری نگر…انفو…لیفٹیننٹ گورنر منوج سِنہا نے جے ایل این ایم ہسپتال رعناواری کا دورہ کیا اور وزیر اعظم نریندر مودی کی 75ویں سالگرہ کی تقریبات کے سلسلے میں’سیوا پکھواڑہ‘کے تحت مریضوں میں پھل تقسیم کئے۔لیفٹیننٹ گورنر نے اَپنے دورے کے موقعہ پر میڈیا اَفراد سے بات کرتے ہوئے وزیر اعظم نریندر مودی کو دِلی سالگرہ کی مُبار ک باد دِی۔اُنہوں نے کہا،”بے لوث خدمت سماجی رِشتوں کو مضبوط بناتی ہے اور ایک مشترکہ مقصد کا جذبہ پیدا کرتی ہے۔ 17 ستمبر سے 2 اکتوبر تک مختلف ’سیوا پَرو‘مہمات خواتین کو بااِختیار بنانے اور صحت کے فروغ کے لئے وقف کی جا رہی ہیں۔“وزیر اعظم نے اَپنی پوری زِندگی قوم کی خدمت کے لئے وقف کر دی۔ اُن کی قیادت میں گزشتہ 11 برسوں کو ہندوستان کی تبدیلی میں ایک سنگ میل کے طور پر دیکھا جاتا ہے اور بھارت دُنیا کی چوتھی سب سے بڑی معیشت بن چکا ہے۔لیفٹیننٹ گورنر نے کہا،”وزیر اعظم نے یہ یقینی بنایا کہ اِقتصادی ترقی کے فوائد غریب اور پسماندہ طبقات تک پہنچیں۔ 25 کروڑ لوگوں کو غربت سے نکالا گیا ہے۔ اُن کی دُور اندیش قیادت میں دُنیا بھر میں ہندوستان کا وقار بہت بڑھ گیا ہے ۔ ہم اُن کی لمبی اور صحت مند زِندگی کے لئے دُعا گو ہیں۔“لیفٹیننٹ گورنر کے ہمراہ سیکرٹری صحت و طبی تعلیم ڈاکٹر سیّد عابد رشید شاہ، ایس ایس پی سری نگر ڈاکٹر جی وِی سندیپ چکرورتی، ضلع ترقیاتی کمشنر سری نگر اَکشے لابرو اور دیگر سینئر اَفسران بھی تھے۔